Кармен Дел Орефиче е најпознатиот модел кој никогаш нема да се пензионира. Шармантната дама пред неколку дена го прослави својот 82-ри роденден, а во исто време беше објавен нејзиниот едиторијал за „Vogue“ Италија.
На фотографиите возрасната Американка ја покажува одржаната фигура, позирајќи заедно со модели кои се барем 60 години помлади од неа.
За фотосесијата „Be In Shape Ever“ направена од Грег Лотус, Кармен носи креации на Шанел и Александар Ванг.
Кармен за првпат била забележана на 13-годишна возраст додека се возела во градски автобус со мајка си. Две години подоцна ја добила својата прва насловна на „Vogue“. До ден денес таа е активна во светот на модата и е особено барана од компаниите чии брендови се поврзуваат со луксуз.
Нејзиниот зачуван изглед донекаде е резултат на мајката природа, но Кармен не се срами да признае дека користи инјекции за подобрување на изгледот. „Ако вашиот таван паѓа, нема ли да го поправите?“ – изјавила таа, одговарајќи на прашањето кое си го поставува секоја жена што ќе ја здогледа.
