Хусто Галего Мартинез, познат како Дон Хусто, е поранешен монах, кој и покрај тоа што има 90 години, продолжува посветено да работи. Тој повеќе од 50 години со свои раце гради катедрала во мал град во Шпанија.
Образованието на Хусто било прекинато поради Шпанската граѓанска војна кога тој имал само 10 години. Откако бил сведок на многу неправди, Дон Хусто решил да отиде во манастир и да го посвети својот живот на Бог. За жал, осум години подоцна бил принуден да го напушти манастирот бидејќи заболел од туберкулоза.
Молејќи се за својот живот, тој се заколнал дека доколку оздрави, ќе изгради храм во чест на Пресвета Богородица.
Откако се подобрила неговата здравствена состојба, Дон Хусто започнал да ја гради црквата на парче земја кое го наследил од своите родители во гратчето Мехорада дел Кампо, во близина на Мадрид.
Без плански дозволи, инженерско или архитектонско искуство, посветениот Шпанец ја започнал изградбата на катедралата на 12 октомври 1961.
„Сметам дека луѓето го губат своето време. Човек може да прави толку многу нешта. Секој може да прави неверојатни нешта“ – вели Дон Хусто.
Вообичаено тој започнува со работа во 6 часот наутро и работи по 10 часа секој ден. Недела му е ден за одмор и за миса.
Дон Хусто најголем дел од времето работи сам. Во последните 20 години нему му помага сограѓанинот Ангел Лопез Санчез, а ја има поддршката и на своите шест внуци и неколку случајни волонтери.
Црквата привлекува многу туристи, кои се одушевуваат на делото на Хусто и со задоволство донираат средства во кутија за донации.
