Оливија Вајлд сними моќно видео кое пренесува силна порака и ја подигнува свеста за Дауновиот синдром.
Видеото започнува со рефлексија на познатата актерка во огледало, а продолжува со зборовите: „Вака јас се гледам себеси. Се гледам себеси како ќерка, сестра и најдобра пријателка. Како личност на која можеш да се потпреш. Се гледам себеси како запознавам некој со кого ќе го споделам животот. Се гледам себеси како пеам, танцувам и се смеам додека не останам без здив. И како плачам, понекогаш. Се гледам себеси како ги следам моите соништа, дури и ако се невозможни. Особено затоа што се невозможни. Се гледам себеси како нормална личност, со важен и убав живот со смисла. Вака јас се гледам себеси. Како ме гледате вие?“
На крајот од видеото, се покажува вистинската личност која ги изговара зборовите – Анароуз Рабрајт, 19-годишна студентка која има Даунов синдром. Покрај тоа што посетува редовна настава во колеџ, Рабрајт има и своја работа во центар за физикална терапија и е спортистка.
„Ајде да го промениме начинот на кој ги гледаме лицата со Даунов синдром“ – пишува во описот на видеото.
Видеото е создадено од CoorDown, италијанска организација која секоја година создава слични видеа пред 21 март, Светскиот ден на лицата со Даунов синдром.
