Медените се вклучија во живо од Холивуд за прес-конференција. Протагонистката Атиџе Муратова, режисерите Тамара Котевска и Љубо Стефанов, кинематограферите Фејми Даут и Самир Љума, како и продуцентот Атанас Георгиев одговараа на прашања од новинарите.
Скромната Атиџе сподели дека најмногу ѝ се допаднал океанот и дека не сака повеќе интервјуа, туку дека сака да се врати на мирниот живот кај своите пчели во Бекирлија. „Сега јас сакам да бидам малку на раат од интервјуата... Со пчелите имам работа“ – рече таа, а подоцна додаде: „Јас сега чекам дома да одам утре и пчелите да ги гледам, тоа мене ми е најбитното. Ми е жал за пчелите. Спијат да, ама пак мене ме чекаат“.
За медот во Македонија, Атиџе вели: „Како што е во нашиот крај, во Македонија, нема нигде мед. Јас одма осеќам, како нашиот нигде нема“.
Кинематограферот Самир откри дека „Медена земја“ има бројни фанови меѓу холивудските ѕвезди. Тој ги издвои Хоакин Феникс, режисерот Тод Филипс и Роџер Дикинс како едни од најголемите обожаватели на филмот со кои се дружеле во изминатите две недели.
Екипата е категорична дека простор за разочарување нема, напротив, тие се пресреќни со постигнатиот успех и пренесената порака. „Секој кој има разочарување треба да се преиспита малце. Срамота е да се има разочарување во ваква ситуација“ – рече Тамара.
„Сметам дека е позначајно што сменивме историја, отколку да добиевме Оскар. Ние цело време велиме, две номинации е подобро од еден Оскар“ – додаде Георгиев.
