Мали деца, мали проблеми. Големи деца, големи проблеми...
Џил Смоклер е мајка на три деца и креатор на сајтот Scary Mommy, која привлече огромно внимание со својата колумна „10 причини зошто децата се полоши на 3-годишна отколку на 2-годишна возраст“. Џил е и еден од најпродаваните автори според The New York Times, а нејзините книги воглавно се наменети за родителите. Нејзината популарност се должи на искрениот, хумористичен и понекогаш саркастичен начин на пишување.
Текстот на Џил ќе ве насмее, независно од возраста на вашето дете.
- На две, едвај зборуваат. На три, никогаш не замолчуваат.
- На две, плачат. На три, имаат толку епски напади на бес, што на моменти сте убедени дека се опседнати од ѓаволот.
- На две, со задоволство јадат сè што ќе ставите пред нив. На три, јадат само три јадења.
- На две, капењата траат 10 минути и резултираат со чисто дете. На три, капењата одземаат повеќе од еден час, а резултатот е потопена бања, накисната мајка и 16 валкани крпи.
- На две, носат пелени кои им ги менувате на одредено време. На три, се одвикнуваат од пелени и светот се врти околу нивните мочки и какушки.
- На две, можете да ги задоволите со едно пакување грицки додека пазарувате. На три, сакаат да ви го диктираат целиот список за пазарување.
- На две, ви дозволуваат да ги облечете, а притоа изгледаат невино и слатко. На три, инсистираат сами да ја изберат својата облека, а на крајот изгледаат како мини верзии на лица од ментална институција.
- На две, не сакаат да се валкаат. На три, живеат од тоа.
- На две, можете да правите многу нешта за нив, што ви заштедува бескрајно многу време. На три, тие мора да прават сè сами, а тоа трае ЦЕЛА ВЕЧНОСТ.
- На две, манипулирањето е последното нешто кое им паѓа напамет. На три, ве вртат на малото прсте. И го знаат тоа.
