Во организација на Македонската коњичка федерација и Коњичкиот клуб ДОНА, на хиподромот во Радишани се одржа четвртото коло од државното првенство во прескокнување пречки.
На натпреварот учествуваа 6 македонски коњички клуба и 2 гостински клуба од соседните земји Србија и Бугарија. Во првиот дел се одржаа четири натпревари во прескокнување на пречки, во различни категории.
Во вториот дел, настанот прерасна во добротворна и општествено одговорна манифестација. Во организација на КК ДОНА и Моден Викенд – Скопје, беше претставена модна ревија на шапки од свежо сезонско цвеќе, креации на дизајнерката Јагода Пачемска, изработени во модното студио ФУ-БУ.
Посетителите имаа единствена можност да ги купат шапките, а средства од продажбата се наменети за купување на коњ за хипотерапија и обука за остручување на хипотерапевти со цел да се помогне во рехабилитацијата и ревитализацијата на деца со посебни потреби во Здружението на граѓани за лица со дисфункции, хендикеп, ретки болести и посебни потреби „Дајте ни крилја“.
