Девојка, која на 23 години си направила двојна мастектомија поради рак, си ги покри лузните со тетоважи за да си ја врати контролата врз сопственото тело. Тетоважите во форма на срце се еден вид душевна терапија за храбрата пациентка.
Ники Блек ја добила лошата дијагноза откако си направила биопсија на 23 години. Веднаш следувала двојна мастектомија, проследена со хемотерапии.
Паѓањето на косата и останатите странични ефекти од лекувањето биле многу тешки за Ники, бидејќи таа полека ја губела контролата врз своето тело. „Повеќе не чувствуваш дека го поседуваш сопственото тело. Менструацијата ти престанува. Имаш жешки бранови. Едноставно ти станува неудобно во твоето тело“ – рекла Блек за The Daily Mail.
Ники била особено изненадена од фактот што мажите често ја сексуализирале оваа болест. „Имаше момчиња кои ме прашуваа која големина гради планирам да си ставам, кои ми кажуваа дека ќе им недостигаат моите гради...“ – рекла Ники.
Откако успеала да се избори со болеста, младата девојка била одлучна дека нема да ѝ дозволи на болеста да го обележи нејзиното тело и си ги покрила лузните со тетоважи. „Причината за тетоважите не е тоа што сакав да си го вратам моето тело од пред операцијата. Само сакав да чувствувам дека телото кое го имам е мое“ – пишува Ники во свој текст за XO Jane и додава: „Тетовирањето е како терапија, операција за душата“.
Иако Блек неодамна дознала дека мора да прима терапија еднаш месечно во текот на следните пет години за превенција, таа вели дека тетоважите ја прават посилна и посреќна. „Тие ми се како оклоп, како заштита од светот. Јас избирам како ќе изгледа моето тело“ – вели Ники.