Лојално куче, кое цела недела бдеело над својот заробен пријател, ќе ви покаже што значи вистинско пријателство. Тили и Фиби една недела се воделе за исчезнати пред да бидат пронајдени заедно во провалија. Фиби била заробена во стар резервоар за вода, а Тили грижливо стоела над неа.
Фотографиите од двете кучиња биле објавени на профилот на невладината организација за спасување на животни „Vashon Island Pet Protectors“, која цела недела трагала по нив.
Тили и Фиби исчезнале од својот дом на 8 септември, а биле пронајдени откако фармер кој живеел во близина на резервоарот забележал црвеникаво куче во близина. Тој стапил во контакт со волонтерите од невладината организација и им раскажал за невообичаената средба. „Тили тивко му се приближила на фармерот и откако го придобила неговото внимание, се свртила и се упатила кон провалија во близина“ – раскажал волонтер за The Dodo.
Потрагата веднаш продолжила на локацијата која ја посочил фармерот и вклучените во неа конечно го слушнале лаењето кое го чекале цела недела. „По неколку минути ја најдовме Тили како лежи со главата на ѕидот од резервоарот. Срцето ни застана... знаевме дека тоа значи дека Фиби е внатре. Речиси една недела Тили стоеше покрај неа со исклучок на времето, кога таа бараше помош. Вистински пријател и пример за моќта на љубовта“ – пишува во описот на фотографиите на Facebook.