Доволна е само една фотографија за да се заљубите во Кора Слокам. Четиригодишното девојче родено со Даунов синдром со модна кампања растопува срца и го менува лицето на убавината.
Брендот „Livie & Luca“ со огромно задоволство ја ангажирал малата Кора за кампањата „#ImGoingBackToSchoolToo“.
„За време на фотосесијата, можеше да се види дека Кора е родена да сјае пред камера... Нејзината заразна радост ја исполни просторијата. Имаме можност да го промениме начинот на којшто медиумите ја претставуваат убавината и се надеваме дека децата како Кора ќе се чувствуваат видени и ќе знаат дека нивните способности се безгранични“ – изјавила претставничка на компанијата.
„Livie & Luca“ соработува со организацијата „Changing the Face of Beauty“, која ги охрабрува компаниите да ангажираат лица со посебни потреби. Кампањата со Кора стана вистински хит, па многу компании одлучија да го следат тој пример.
Пред извесно време тинејџерката Медлин Стјуарт, која исто така има Даунов синдром, успешно зачекори во модниот свет. Наскоро таа и ќе дефилира на Њујоршката недела на модата.
