Децата ги обожаваат животните и искрено знаат да им се радуваат, а Русинката Елена Карнеева цели да ја овековечи нивната врска со својот фотоапарат. И слободно може да се каже дека е доста успешна во тоа.
Младата фотографка од Москва се обидува да го погледне светот преку детските очи, пред да го притисне копчето од фотоапаратот и порачува дека треба да бидете трпеливи за да направите импресивна фотографија од дете. „Кога фотографирате деца, многу е важно да нурнете во светот на детството, да го предвидите и почувствувате движењето на детето и да ја разберете неговата мотивација. Сакате да фотографирате деца? Тогаш научете да го гледате светот преку очите на децата. И што е најважно, посветете време. За успешна фотографија, понекогаш е потребно да чекате со часови“ – советува Карнеева.
Сите фотографии од деца и животни на Карнеева се направени во природа, а благодарение на нејзината посветеност и љубов кон фотографијата, тие имаат моќ да пренесат пријатни емоции.