По несреќата која се случи во март 2011 година во нуклеарната централа Фукушима во Јапонија, беа евакуирани сите жители од околината поради зголемената радијација. Но, додека сите заборавија на животните, единствено Наото Мацумура се врати да се грижи за нив.
55-годишниот Јапонец, нарекуван „чуварот на животните во Фукушима“, веќе 4 години се грижи за животните, а храната и водата ги добива преку донации. Тој живее во малото гратче Томиока, кое е оддалечено 11 километри од нуклеарната централа.
По евакуацијата, Наото и неговото семејство имале тешкотии да најдат покрив над главата. Камповите за спасување биле преполни, а семејството било одбиено да престојува и кај блиски роднини. Во таа ситуација, несебичниот Наото решил да се врати во својот дом и да ги провери животните на семејната фарма.
„Нашите кучиња не беа нахранети во првите неколку дена. Кога им дадов јадење, кучињата на соседите започнаа да полудуваат. Отидов таму за да ги проверам и видов дека сите се врзани. Претпоставувам дека сите заминаа од градот мислејќи дека ќе се вратат дома за околу една недела. Оттогаш јас ги хранам сите кучиња и мачиња секој ден... Тие беа нетрпеливи, па сите се собираа и лаеја громогласно веднаш штом ќе го чуеја мојот камион. Каде и да одев се слушаше лаење, како да ми велеа „ние сме жедни“ или „ние немаме никаква храна“. Па јас постојано кружев наоколу“ – изјавил Наото за VICE.
Откако бил подложен на тестирање, Наото бил предупреден дека е изложен на висок степен на радијација, но дека нема да ги почувствува последиците во наредните 30-40 години. „Ми кажаа дека нема да се разболам во следните 30 или 40 години. Дотогаш ионака ќе бидам мртов, па тоа ни најмалку не ме загрижува“ – додал Мацумура.
И покрај тоа што владата му забранила да остане во озрачената зона, несебичниот Јапонец одбива да замине и да ги напушти животните.