Нигеријка се најде на вистинското место во вистинското време и само една фотографија целосно ѝ го промени животот.
Убавата продавачка на леб поминувала додека раперот Тајни Темпа снимал фотосесија во Лагос. Фотографката Тију Бело реагирала веднаш и ја прашала дали може да ја слика, а таа кимнала со главата.
Откако фотографијата била објавена на социјалните мрежи, многумина сметале дека станува збор за професионален модел. Тоа ја навело Бело да ја побара девојката за да ѝ понуди нова работа.
„Не мислев дека направив добра слика. Кога фотографиите се појавија првпат на социјалните мрежи, сите веднаш помислија дека таа е модел. Никој не веруваше дека таа само беше на поминување. Си размислував, ако сите мислат дека таа е модел, тогаш можеби таа треба да биде модел, па започна потрагата“ – изјавила Бело.
Така беше откриена Олаџумоке Орисагуна. Младата мајка на две деца продавала леб за заработка од еден долар дневно. Сега веќе има договор со агенција за модели, а поради славата која ја стекна, е на добар пат да стане успешен модел.
„Не очекував дека ова ќе ми се случи мене. Пријателите ми кажаа дека ме виделе на телевизија и се многу среќни. Моите родители не можат да поверуваат дека нивното дете постигна ваков успех. Сите се многу среќни“ – изјавила Орисагуна која била ангажирана од познат дизајнер од Нигерија.
На Џумоке ѝ била доделена стипендија за да може да го заврши своето образование, а исто така една банка го платила школувањето на нејзините две деца.
„Ова е феноменална приказна“ – коментирала Бело.
