Милијардер за почит: Кинез почестил 6.400 свои вработени со одмор во Франција

Некои шефови навистина заслужуваат почит.

Сопственик на огромна кинеска компанија поведе со себе 6.400 од своите вработени на 4-дневен одмор во Франција, резервирајќи 140 хотели во главниот град Париз и повеќе од 4.700 хотелски соби на Азурниот брег. Кинеските туристи слетале во Франција со 84 авиони, а за нивен превоз биле ангажирани 146 автобуси.

Вработените во Tiens Group, компанијата предводена од Ли Ѓинјуен, се најбројната туристичка група која кога било ја има посетено Франција. Патувањето вклучува приватно разгледување на музејот Лувр и посета на кабарето Мулен Руж. Луксузната стоковна куќа Galeries Lafayette ги затворила вратите за други купувачи, со цел кинеските туристи да можат релаксирано да ги разгледаат штандовите.

„Tiens Group“ брои околу 12.000 вработени, а повеќе од половина од нив добија можност да бидат дел од патувањето организирано по повод 20-годишнината на компанијата.

За време на екскурзијата, кинеските туристи влегоа во Гинисовата книга на рекорди откако на плажа во Ница ја испишаа најдолгата фраза направена од луѓе – „Tiens’ dream is Nice in the Cote d’Azur“.

Проценето е дека за 4 дена, групата ќе потроши околу 13 милиони евра.