Мајка на две ќерки облече моќен костум на последниот ден од хемотерапијата за да покаже дека вистинските супер-херои се пациентите кои водат тешка битка со ракот во болниците. Гордата Австралијка доби поддршка од своето семејство, кое постојано беше покрај неа додека се бореше со ракот на дојка, а сега позираше заедно со неа.
Даниел Јаверниг дознала дека има рак на дојка и дека го носи наследниот ген BRCA1 во мај, откако отишла на преглед поради многу остра болка во десната града. Веднаш започнала лекување со хемотерапии, но и покрај тоа, морало да ѝ бидат отстранети двете гради. „По три месеци морав да бидам подложена на мастектомија, бидејќи хемотерапијата не ги намалуваше моите тумори. Ми отстранија 32 лимфни жлезди од раката“ – рекла Даниел.
По операцијата, докторот ја истражил нејзината семејна историја и дознал дека неколку блиски членови од нејзиното семејство за кои таа не знаела, починале од рак. Генот BRCA1 е наследен и кај жените го зголемува ризикот за рак на дојка за 80% и на јајниците за 40%.
И покрај сè, Даниел не го изгубила својот забавен дух и на последниот ден од хемотерапијата решила да се претвори во супер-херој. На инспиративната фотосесија ѝ се придружиле и нејзините најблиски, меѓу кои и 5-годишните ќерки близначки.
„Поентата не беше да се облечам како супер-жена. Идејата беше за целото семејство“ – рекла таа и додала: „Има толку многу жени и деца кои секој ден преживуваат хемотерапии. Секој еден во тој оддел за хемотерапија е супер-херој. Колку и да сме болни, сите сме заедно во ова“.
Јаверниг вели дека посакува да откриела за генот порано, но дека нема да дозволи истото да им се случи на нејзините ќерки. Таа ги поттикнува луѓето да ја научат својата семејна историја за болести како рак на дојка или на јајници. „Знаењето е моќ. Научи ја својата семејна историја“ – вели таа.
Иако на Даниел ѝ претстојат третмани со зрачење, таа вели дека во следните недели ќе може да издише со олеснување.
