Социјален експеримент со момче кое глуми дека е бездомник и моли за помош го обиколи светот. Видеото за само три дена е прегледувано над 3,4 милиони пати на YouTube.
Во видеото, на температура од -15°C момче по маица со кратки ракави и парталави фармерки се тресе од студ и бара помош од минувачите. Во еден момент дури и влегува во голема црна вреќа за да се стопли. Околу два часа никој не застанува да му помогне.
По долгото чекање, бездомник од другата страна од патеката му приоѓа на момчето. Човекот го прашува што се случило и каде се неговите родители. Откако момчето му вели дека родителите го напуштиле, добродушниот човек го покрива со својата јакна и му дава пари за храна.
Експериментот е направен од двајцата браќа на премрзнатото момче, кои биле трогнати од несебичното дело на бездомникот. На крајот од видеото тие му се заблагодаруваат за хуманата постапка.