Децата се нашето најголемо богатство, наше наследство и наша гордост. Еден ден ги гледаме како со боси нозе шлапкаат во вировите, трчаат незапирливо и им раскажуваат приказни на своите плишени мечиња, за „утре“ да ги видиме како нè претставуваат во врвни институции, спасуваат животи во бели мантили и подучуваат други деца во училишните клупи.
Да помогнеме сите деца да имаат среќно и безгрижно детство. Денес се слави Светскиот ден на детето.
Овој важен ден, посветен на најмалите се слави од 1954 година, а датумот 20 ноември бил избран од страна на Генералното собрание на Обединетите Нации. Празникот е создаден за да промовира еден вид на братство меѓу сите деца низ светот, градено врз разбирање и еднаквост. Втората цел е да се промовираат идеи и активности кои ќе ја зголемат благосостојбата на децата, особено во деловите погодени од сиромаштија, вооружени конфликти и дискриминација.
Датумот се совпаѓа со носењето на Декларацијата за правата на детето. Во Декларацијата се вели дека секое дете има право на живот, здравје, образование и игра, како и право на семеен живот, заштита од насилство и дискриминација и право на свое мислење.
“
Единственото нешто кое е заедничко за сите деца се нивните права. Секое дете има право да преживее и да се развива, да се образува, да живее без насилство и злоупотреба, да има свое мислење и да биде слушнато
Деца работници во Газа
УНИЦЕФ денес ја започна кампањата за борба против неправичноста, а исто така го објави својот извештај за оваа година. „Во една генерација, светот ја преполови смртноста меѓу децата, им овозможи на 90% од децата да посетат основно училиште и го зголеми за 2,6 милијарди бројот на луѓе кои имаат достап до чиста вода за пиење. И покрај тоа, децата сочинуваат речиси една половина од сиромашните лица во светот, речиси 250 милиони деца живеат во земји зафатени од конфликти и повеќе од 200.000 деца си ги ризикуваа животите оваа година за да најдат прибежиште во Европа“ – се вели во извештајот.
Во рамките на кампањата, амбасадорите на УНИЦЕФ како Шакира, Орландо Блум и Лиам Нисон го кренаа својот глас за поттикнат на акција во рамките на кампањата „Fight Unfair“. Во својата изјава, Орландо Блум зборуваше за својата посета на бегалците во Гевгелија.
„Шокантно е кога ќе помислите дека едно на девет деца живее во земја зафатена од вооружен конфликт, е сведок на ужасни насилства и нема право на преживување, здравје и образование. Патував со УНИЦЕФ низ Македонија и Србија и видов како војната ги принудува децата и нивните семејства да ги напуштаат домовите. Светот се соочува со најголемата бегалска криза по Втората светска војна. Секоја земја која е во можност треба да им даде поддршка на загрозените деца и семејства“ – изјавил Блум.
Денес покажете му на вашето дете колку го сакате, поминете квалитетно време со него, научете го на добри манири и уверете го дека е безбедно и заштитено во неговиот дом. Бидете хумани и донирајте облека или храна за најсиромашните дечиња и не го одминувајте детето-бездомник без да му помогнете.
