Магичните фотографии на Кристина Биули од нејзината 4-годишна ќерка ќе ве внесат во светот на бајките. Талентираната фотографка создаде фантастичен фото-серијал со малата Жизел, која има Даунов синдром.
Кристина со својот сопруг за првпат ја одвеле Жизел во Дизниленд во септември минатата година и оттогаш, тие го посетуваат забавниот парк секој месец и ги создаваат слатките фотографии. Грижливата мајка ги шие костимите на малото девојче и за секоја посета на паркот таа подготвува нов волшебен фустан.
Биули се научила да шие бидејќи ќерка ѝ имала проблеми со некомотните материјали. „Кога таа беше малечка, не сакаше тулови и ткаенини кои ја чешаа. Таа имаше проблеми со текстурите, па јас се научив да шијам за таа да може да има фустани за принцези“ – рекла Кристина за Huffington Post.
„Секој пат кога ќе отидеме во Дизниленд, Жизел станува сè посамоуверена. Таа не е толку срамежлива. Кога ја гледаме како блика од радост, целото патување се исплаќа“ – изјавила Биули и додала дека вработените во Дизниленд ѝ помагаат на Жизел „да излезе од својата школка“.
Биули вели дека растењето на дете со специјални потреби ја научило да го забави темпото и навистина да ужива во малите нешта во животот.