Јелена и Новак Ѓоковиќ беа во посета на Белград. Парот се врати во својата татковина за да го прослави 31. роденден на Јелена со најблиските.
Во текот на минатата недела, 30-годишниот тенисер и неговата бремена сопруга неколкупати беа фотографирани во главниот град на Србија. Неуморните фоторепортери го следеа парот додека се упатуваше на театарска претстава и концерт.
За театарската претстава, згодната трудница избра мини фустан, додека за концертот таа беше облечена во долг фустан и фармерска јакна.
Среќната славеничка со селфи фотографија им се заблагодари на сите за убавите роденденски желби.
Јелена е родена на 17 јуни 1986 година во Белград. Таа започна да се состанува со Ноле во 2005 година, а во јули 2014 година тие стапија во брак. Заедно имаат едно дете, синчето Стефан, а во моментов го очекуваат второто дете. Според српските медиуми, Јелена носи девојче и треба да се породи во текот на август.
