Свеченото отворање на 40-тото издание на фестивалот „Браќа Манаки“ беше проследено со мултимедијален перформанс кој спојуваше визуелни проекции, танц, холограми, звук и пеење, користејќи ја музиката од филмот „Среќна Нова '49“ на композиторот Љупчо Константинов, годинешниот добитник на наградата „Голема ѕвезда на македонскиот филм“.
„На поетичен начин беше направен визуелно-кинестетички спој на реално присуство на тела во просторот. Како мотив беше земена темата на јубилејното издание на фестивалот 'Браќа Манаки' – етеричното мото 'Kaжи им на облаците' (Tell the Clouds)“ - велат од организаторите.
Гледачите имаа можност да почувствуваат дека се дел од таа етерична илузија.
Режијата е на Срѓан Јанакиевиќ, кореографијата ја осмисли Искра Шукарова, зад холограмите стои Јохан Мелин, вокалот е на Стефанија Милевска, а изведувачи се Марија Ристеска, Христина Aнгеловска, Меланија Гоцевска, Ева Џингова, Исидора Китановиќ, Искра Шукарова и Стефанија Милевска.
Костимите се дело на Марија Пупучевска додека сценографијата е на Искра Ветероска.
Фотографиите од настанот ги потпишува Ивона Кочов.