Албанската дизајнерка Мирела Нурче создаде уникатна модна колекција од цртежи на деца со оштетен слух. Моделите беа претставени од познати личности од Албанија на ревија одржана на 3 декември, Меѓународниот ден на лицата со хендикеп.
Нурче ги собра малите уметнички дела на учениците од Институтот за глуви лица во Тирана и ги вметна во голем проект за да ја запознае пошироката јавност за талентот на овие деца. Цртежите беа испечатени на облека од материјали како свила и волна, на модни додатоци и обувки.
За колекцијата „With innocence on“, познатата Албанка соработуваше со главниот уредник на списанието „Living Albania“, а проектот беше поддржан и од UNDP Албанија и Шведската амбасада во Тирана.
Мотото на проектот на Нурче беше „Лица со хендикеп, но со неограничени таленти!“, а заштитно лице е албанскиот и светски познат супер модел Емина Чунмулај.