Маж од Монтана ја изненади саканата со специјален предлог за брак. Џоел Бут ја запроси Кејди Латимер со помош на кученце кое ѝ го подари, а фотографиите од романтичниот момент ќе бидат бесценет спомен за младиот пар.
Имено, 30-годишниот Џоел ѝ кажал на 28-годишната Кејди дека ќе снимаат фотосесија со локални фотографи, за таа да не се сомнева во неговите намери.
Додека позирала Кејди, Џоел се појавил со мал златен ретривер во рацете. Девојката мислела дека кученцето случајно се нашло на локацијата на која снимале, но Џоел ѝ кажал дека тоа е подарок за неа. Потоа ѝ рекол да го погледне ремчето за да дознае кое име му го дал на новото милениче.
Кога го погледнала ремчето, таа го видела судбоносното прашање: „Кејди, ќе се омажиш ли за мене?“. Среќната девојка веднаш одговорила „ДА“.
Вереничкиот прстен планирано било да го донесе поголемото куче на Џоел, но тоа накратко избегало во шумата бркајќи верверичка. И покрај смешната случка, моментот бил совршен за младиот пар и прстенот завршил на раката на шармантната Кејди.