Бјанка Балти ја сподели својата најинтимна и најтешка животна приказна за да ја подигне свеста кај жените за ракот на дојка и јајници.
Во емотивна објава, италијанската манекенка откри детали за својата борба со рак на јајници и превентивната двојна мастектомија поради генетска мутација на BRCA1 генот. Бјанка ги покажа раните од операциите на градите и на стомакот, како и последиците од хемотерапиите врз нејзиниот изглед.
Бјанка сподели дека има рак на јајниците минатиот септември. Во 2022 година, Балти објави дека го носи мутираниот ген BRCA1, кој значително го зголемува ризикот за развој на рак на дојки и јајници. Тогаш, таа направи превентивна операција за отстранување на градите, но пред да се одлучи да ги отстрани и јајниците, доби дијагноза рак во трет стадиум.
Хемотерапиите ги започна точно пред една година, на 14 октомври, а како последица на третманите, ја изгуби косата.
За интервјуто за Elle Франција, Балти напиша:
Благодарам Elle што ја споделивте мојата приказна во октомвриското издание посветено на подигање на свеста за рак на дојка.
Премногу од нас одат по овој пат — стравот, борбата, неизвесноста. Но, дури и во најтешките периоди, можеме да се издигнеме, да се излечиме и повторно да си ја вратиме силата.
Споделувањето на моето патување — од моментот кога дознав за мојата генетска мутација, до одлуката за превентивна мастектомија, па сè до соочувањето со рак на јајници — веќе направи разлика. Жени закажуваат прегледи, некои направија генетско тестирање. А некои жени — дури и мали девојчиња — ми кажаа дека сега се чувствуваат погорди кога ја покажуваат ќелавата глава.
Тоа е моќта на гласот: шансата да поттикнеш промена и да ја претвориш болката во цел. Работи се случуваат во животот — јас само се обидувам да им дадам значење на моите.
Благодарам што ми помогнавте да најдам смисла во сè што ми се случи и што ја претворивте мојата приказна во надеж.
Неодамна, Балти јавно ја испрати својата молба до тимот на Victoria’s Secret, барајќи да дефилира на модната ревија која се одржува денес, во Месецот за подигнување на свеста за рак на дојка, „бидејќи ја застапувам секоја жена која се соочува со рак и сé уште се осмелува да се чувствува убава“.
„Никој не е имун“ — пишува таа.
Знаејќи како е да се чекори на ревијата, бидејќи во 2005 година била дел од неа, во отвореното писмо до брендот, Балти напишала:
И јас треба да бидам таму.
Инклузивноста значи да направиш твојата публика да се чувствува видена. А еве ја вистината — 1 од 3 жени ќе се соочи со рак во текот на животот. 1 од 8 — со рак на дојка. Илјадници ќе се соочат со рак на јајници.
Јас сум една од нив.
Откако ми беше дијагностициран рак минатата година, станав глас на безброј жени. Ми пишуваат секојдневно — жени на терапија, жени кои преживеале, мајки, дури и деца кои се борат со рак — за да ми кажат дека им дава надеж кога ме гледаат како ја споделувам мојата приказна, појавувајќи се без перика на национална телевизија и прифаќајќи ги моите лузни.
Од прва рака знам колку ни е потребен некој на кого можеме да се угледаме кога се чувствуваме скршени.
За жал, во моментот на испраќањето на писмото, кастингот бил веќе завршен.
