Меган Маркл беше насмеана и расположена додека пристигнуваше во засолниште за жени кое се наоѓа во една од најсиромашните области на Канада.
Ова е првпат 38-годишната Војвотка да биде фотографирана по веста дека со принцот Хари се откажаа од кралските должности и по нејзиното заминување од Велика Британија. Таа со мал авион пристигна во центарот за жени „Downtown Eastside“ за да им понуди помош и да им го зголеми еланот на вработените.
„Војвотката од Сасекс, Меган Маркл, нè посети денес за да дискутираме за проблемите кои ги засегаат жените во заедницата“ – изјавија од центарот.
Центарот за жени „Downtown Eastside“ им овозможува безбедно место на жени и деца кои имаат потреба од помош. „Ги поддржуваме жените да направат позитивни промени во нивниот живот, нудејќи им различни услуги“ – велат од центарот.
Пред два дена, Кралицата Елизабета со соопштение ѝ се обрати на јавноста во врска со случувањата со Хари и Меган. Во него стои:
„Денес, моето семејство имаше многу конструктивна дискусија за иднината на мојот внук и неговото семејство. Јас и моето семејство целосно ја поддржуваме желбата на Хари и Меган да создадат нов живот како младо семејство. Иако преферираме тие да останат и да работат со полно работно време како членови на кралското семејство, ја почитуваме и разбираме нивната желба да живеат понезависен живот како семејство, додека истовремено ќе бидат ценет дел од моето семејство. Хари и Меган јасно изјавија дека не сакаат да зависат од јавни фондови во нивниот нов живот. Беше договорено да има период на транзиција во кој тие ќе поминуваат време и во Канада и во Британија. Ова се комплексни прашања кои моето семејство треба да ги реши и има уште работа на нив, но јас побарав крајната одлука да биде донесена во претстојните денови“.
Парот беше фотографиран еден ден пред да ја соопшти својата одлука.