Во градот на младоста и песната, под светлата на сцената во Домот на културата „Ацо Шопов“, синоќа беше отворено јубилејното 40-то издание на „Макфест“, фестивал кој веќе четири децении го чува идентитетот на македонската забавна музика и нејзината најубава традиција.
Првата фестивалска вечер беше посветена на новата генерација пејачи, млади луѓе со сон, глас и храброст да чекорат по патот што пред нив го трасирале легендите на македонската сцена. Во атмосфера исполнета со возбуда и аплаузи, дебитантите ја почувствуваа магијата на првото појавување пред голема публика.
На сцената се претставија Валдера, Анастасија Никова, Дорис Ди, Бобан Вељановски, Марија Наумовска, Катерина Јовановиќ, Боно и Тами, Дино Петриќ, Санела Шукриевска, Стефан Ефремов, Агни Авшар, Еми и Елена Наумова.
На победничката листа свое место си обезбедија: Стефан Ефремов, Агни Авшар, Елена Наумова, Дино Периќ, Дорис Ди и Катерина Јовановиќ.
Свечениот почеток го означија градоначалникот на Штип, Иван Јорданов, и уметничкиот директор на фестивалот, Роберт Саздов, кои во своите обраќања нагласија дека „Макфест“ не е само фестивал, туку симбол на културниот континуитет, платформа што обединува генерации и ги поттикнува младите да создаваат, пеат и сонуваат на свој јазик.
Втората вечер ќе биде резервирана за искусните изведувачи кои оставиле трага на македонската сцена, а големата гала-вечер на 25 октомври ќе го заокружи славеничкиот циклус со избор од највеличествените хитови во историјата на фестивалот, односно вистинска музичка ретроспектива на времето, гласовите и емоциите што обележале една епоха.
Сите три фестивалски вечери се емитуваат во живо на МРТ со почеток во 20 часот, а вечерите ги водат харизматичните Марјана Станојковска и Димитар Атанасовски, кои со својата елеганција и ведрина го дополнуваат сјајот на сцената.
ФОТО: Тоши Трајчев / Femina.mk
