Борбата со рак е истоштувачка – психички, физички и финансиски. Иницијативата на една Американка им го олеснува барем малку животот на илјадници жени кои ја водат најтешката здравствена битка.
Деби Сардон ја основала организацијата „Cleaning For A Reason“ со цел да ги намали грижите на жените кои се лекуваат од рак, за тие да можат потполно да се фокусираат на здравјето. Во големата акција, над 1.200 чистачки од САД и Канада го донираат своето време и труд за да ги светнат домовите на пациентки.
Пред околу дваесетина години, еден телефонски разговор ја поттикнал Деби да ја создаде добротворната организација. Таа поседувала компанија за чистење кога потенцијална клиентка ѝ рекла: „Сега не можам да си дозволам чистење. Се лекувам од рак“. Нивниот разговор веднаш бил прекинат, па Деби не успеала да земе адреса или телефонски број за да може повторно да ја контактира жената. Во тој момент, таа решила дека ниту една жена која боледува од рак нема да биде одбиена од нејзината фирма. Така Деби започнала да им нуди бесплатно чистење на жените во лоша здравствена состојба.
Со поддршка од повеќе компании и доброволци, Деби им има помогнато на 19.000 жени.