Новиот краток анимиран филм на Pixar допира до срцата на сите љубители на животните.
Во „Kitbull“ се прикажани мало маченце и малтретирано куче од расата питбул кои случајно започнуваат да живеат во ист двор и под тажни околности, формираат цврсто пријателство.
Видеото се обидува да ги побие стереотипите за питбулите, покажувајќи дека се мирољубиви и најчесто стануваат агресивни поради нивните сопственици или злонамерни лица.
„Да бидам искрена, видеото го започнав само со мачка. Сакам да гледам видеа со мачки кога сум под стрес. И си помислив, сакам да нацртам мало маченце кое прави нешто глупаво и смешно. Најпрво, сакав да нацртам нешто што ќе направи да се чувствувам добро и кое ќе биде забавно, но тоа еволуираше во нешто многу лично за мене. На крајот, сфатив дека додека растев бев многу чувствителна и срамежлива. Имав многу потешкотии во создавањето врски и пријателства. Па се поврзав со ова маче, бидејќи тоа никогаш нема излезено од комфорната зона, да биде ранливо и да создаде контакти. Па веројатно така настана приказната“ – изјавила креаторката на трогателниот филм, Росана Саливан.
