Денес се одбележува Светскиот ден на менталното здравје, кој има за цел да нé потсети на значењето на грижата за себе и за другите.
Во фокусот сè почесто се става една група која во минатото беше во сенка, а тоа се децата. Токму нивниот емоционален и психички развој ја поставува основата за личноста во која ќе прераснат, за тоа какви возрасни ќе станат, како ќе се носат со предизвиците и какви односи ќе градат со другите.
Раните искуства на детето директно влијаат на тоа колку ќе биде самоуверено и емоционално зрело во иднина.
Наташа Бекирова е дипломиран психолог, кој непрекинато ја потенцира важноста на безусловното прифаќање на детето онакво какво што е. На Светскиот ден на менталното здравје, за Femina.mk, истакна:
“
Колку раните искуства се позитивни, негативни и колку ќе бидат трауматични го детерминираат начинот на кој што понатаму ќе се развива личноста. Колку поголема благосостојба, безбедност и љубов им обезбедиме на децата толку поцврста и трасирана патека ќе имаат понатаму во животот. Ќе бидат поотпорни, емотивно зрели, ќе формираат поздрави релации, ќе бидат поборбени кон предизвиците кои животот неминовно ги носи. Менталното здравје на децата е навистина многу важно.
Бекирова во пост на Facebook преку примери наведе како родителите можат позитивно да делуваат на зголемување на самодовербата и подобрување на менталното здравје кај децата. Еве ја нејзината објава.
Една од најдлабоките и базични потреби кај секое дете е да се чувствува безусловно прифатено.
Тоа значи дека детето треба да слуша и чувствува дека е сакано не поради тоа што е „мирно“ или „послушно“, туку поради тоа што е уникатно и неповторливо.
Неколку пример кои можат позитивно да влијаат врз самодовербата и менталното здравје на децата.
Добар пример: Јас те познавам добро, ти си добро дете, а ова однесување кога удираш баш ме изненадува.
Кажувај му често дека го сакаш безусловно
Добар пример: Те сакам и кога се смееме и кога се караме. Те сакам секогаш.
Слушај го детето со внимание, будно и присутно
Добар пример: Дојди сега да ми кажеш, сега сум целосно тука за тебе.
Дозволи му да се чувствува луто, тажно, исплашено
Добар пример: Ми личи дека се чувствуваш лутo. Сигурно имаш силна причина да се чувствуваш така. Раскажи ми за тоа.
Уважи го трудот, не само резултатот
Добар пример: Многу се потруди да си ги средиш играчките, баш си вредно дете.
Дозволи му да греши
Добар пример: На секој може да му се случи грешка. И јас понекогаш грешам. Што можеш да направиш поразлично следниот пат?
Покажи му дека веруваш во него, дури и кога самото се сомнева
Добар пример: Гледам дека те лути кога не успеваш да ги наредиш коцките, ама јас сум сигурна дека ако многу вежбаш, ќе успееш.
Поттикни ја самостојноста
Добар пример: Многу се гордеам со тебе, што успеваш сам/а да си ја средиш собата.
Наташа Бекирова, психолог
