Во Македонската филхармонија синоќа се одржа премиерата на филмот „Врба“, кој заслужено добива позитивни рецензии низ целиот свет.
По успешната светска премиера на Филмскиот фестивал во Рим, и македонската публика реагираше со големо одушевување и гласни аплаузи на најновото дело на Милчо Манчевски.
На црвениот тепих и коктелот по премиерата се појавија самиот режисер и филмската екипа, како и повеќе јавни личности од нашата држава, меѓу кои и претседателот Стево Пендаровски со сопругата Елизабета, актерката Јелена Јованова со сопругот Стјепан Периќ, манекенката и актерка Катарина Ивановска со вереникот Цобе, обвинителката Фатиме Фетаи и поранешната манекенка Надица Георгиева со сопругот Иво Јанковски.
„Врба“ испреплетува три приказни за љубов и доверба – едната од македонското средновековие, другите современи - се огледуваат и се во контраст една со друга. Иако ги раздвојуваат векови, ликовите во „Врба” имаат слични грижи, радости и соништа.
Интересно е што филмот има машка и женска верзија. Манчевски за тоа вели: „Не се разликуваат многу, ама едната е подинамична, а другата подлабока. И двете се подеднакво интересни - на различен начин. Женската верзија ќе се прикажува во Синеплекс, а машката во Милениум.“
Од синоќа филмот е на редовен репертоар во скопските кина Синеплекс и Милениум, а филмот се прикажува и во Битола, Штип, Охрид, Кичево, Струга. Од 4 ноември почнува да се прикажува во Прилеп и Свети Николе, во Гевгелија од 9 ноември, Кочани и Македонска Каменица од 14 ноември, а во преговори се прикажувања на филмот и во останатите градови од земјава.