Џенифер Лопез засекогаш ќе остане запаметена во светот на музиката и модата по иконскиот зелен фустан Версаче, во кој заведуваше на доделувањето на наградите Греми во 2000 година.
49-годишната пејачка објави видео на својот YouTube канал, во кое раскажува сè за разголената креација со тропски дезен. Нарекувајќи го фустанот „мојот најголем моден момент“, Лопез откри дека тој е заслужен за создавањето на Google Images.
Но, Џеј Ло за малку немало да ја носи прочуената креација од Версаче, бидејќи нејзината стилистка инсистирала таа да носи друг фустан. Причината била во тоа што зелената креација била носена трипати претходно, дури и од самата Донатела Версаче, и дека веќе била видена од јавноста.
Менаџерот на Лопез, Бени Медина, ја убедил славната музичарка да го одбере зелениот фустан. „Го облеков зелениот фустан и излегов и Бени рече: ‘Тоа е тоа. Тоа е тоа. Не вели ништо. Тоа е фустанот’“ – вели Лопез во видеото и објаснува дека најмногу била загрижена да не ѝ се отскријат градите на сцената, каде требало да додели награда. Но, откако ставиле двострана леплива лента на рабовите на фустанот, таа загриженост исчезнала.
Само што зачекорила на црвениот тепих, сите погледи и објективи се насочиле кон Лопез и таа вели дека не можела да разбере што се случува. „Одеднаш започнав да слушам мрморење. Си реков дека тоа е Греми и мора да има некој славен зад нас. Беше лудница. Блицовите одеднаш започнаа да светат на начин кој не беше вообичаен. Имаше екстра кинетичка енергија таму. Се прашував што се случува. Немав претстава дека сè беше поради овој фустан“ – објаснува таа.
Лопез вели дека истата одушевувачка реакција гостите на Греми ја имале и кога таа се појавила на сцената.
Видео
Лопез најмногу се изненадила следниот ден, кога се појавила на насловните страници на врвните модни списанија. „Во аголот стоеше дека Сантана освои 11 Греми награди. Си реков, овој човек штотуку сруши рекорди, но луѓето сакаат да знаат за овој фустан. Тоа беше најлудото нешто, но само ја покажува моќта на модата“ – вели Џенифер.
Огромниот интерес на луѓето за фустанот бил причината за создавање на Google Images. „Толку многу луѓе пребаруваа за ова, но тие немаа претстава како да пребаруваат фотографија во тоа време на интернет, па го создадоа Google Images“ – објаснува славната поп дива.
На крајот од видеозаписот, Џенифер откри дека во мај, на балот МЕТ, ќе носи креација од Версаче. Со солзи во очите, таа изрази сочувство за еден од кројачите кој починал пред неколку дена додека работел на новата креација.
