„Жените носат панталони секој ден“: Актерот кој носеше фустан на Оскар го објасни својот моден избор

Били Портер зачекори во долг кадифен сако-фустан на црвениот тепих на Оскар 2019 и разбирливо привлече големо внимание кон себе.

49-годишниот актер од серијата „Pose“ избра креација која е дело на дизајнерот Кристијан Сиријано, а ја надополни со обувки од Рик Овен и накит од Оскар Хејман.

Со својот изглед Портер целел да му се спротивстави на строгиот дрес код во Холивуд и да ги поттикне мажите да бидат поигриви при изборот на облека за на црвениот тепих.

Во интервју за „Вог“, Портер ја образложи својата одлука:

„Модата отсекогаш ме инспирирала. Баба ми, мајка ми – отсекогаш имаа стил. Растев сакајќи ја модата, но имаше ограничувања на начините на кои можев да се изразувам себеси. Кога си црнец и хомосексуалец, твојата машкост е доведена во прашање. Сум се соочувал со хомофобија поради мојот избор на облека.“

„... Сега, кога сум во Pose, ме канат на црвениот тепих и јас имам нешто да кажам преку облеката. Целта ми е да бидам движечко парче политичка уметност секојпат кога ќе се појавам. Да ги предизвикам очекувањата. Што е мажественоста? Што значи тоа? Жените секој ден се појавуваат во панталони, но кога маж ќе носи фустан, тоа е чудо големо. Верувам дека мажите на црвениот тепих би сакале да бидат поигриви. Оваа индустрија се маскира како инклузивна, но актерите се плашат да играат, бидејќи ако покажат нешто кое излегува од статус кво, тие може да бидат гледани како женствени и како резултат на тоа, нема да добиваат мажествени улоги, улоги на суперхерои“ – рекол Били.