Еве во чии раце завршија наградите на Златна бубамара на популарноста 2020

Синоќа, во А1 Арената, се одржа 23-тото издание на Златна бубамара на популарноста.

На манифестацијата, која оваа година се одржа под мотото „Нема правда, има Бубамара“, водител повторно беше Сашко Коцев.

Свеченоста беше отворена со настапот на членовите на танцовото студио „Еурека“. Тие добија Златна Бубамара за инклузивност за претставата „Пепелашка“, првата претстава во која главните улоги ги играат деца со попреченост.

Наградата за Интернационален успех во областа на филмот ја доби македонскиот кандидат за Oскар „Медена земја“.

Тамара Тодевска ја имаше честа да се закити со две награди – Пејачка на годината и Хит на годината за „Proud“.

Интернационалната награда за животно дело му припадна на Раде Шербеџија.

За заедничкиот настап со Мирослав Тадиќ во Античкиот театар во Охрид, Влатко Стефановски беше добитник на Златна Бубамара за Концерт на годината.

Наградата во новата категорија Песна за век и векови заврши во рацете на Џина Папас Џокси за неговиот евергрин „На Велигден“.

„Дајте музика“ беше прогласена за Најпопуларна детска емисија.

Наградата за Најдобра регионална пејачка заврши во рацете на Јелена Розга.

„Преспав“ беше избран за Најпопуларен ТВ Проект.

Златната бубамара за Пејач на годината му беше врачена на Влатко Лозаноски.

Награда за Најдобра сатирична емисија доби тимот на „Фчерашни новости“.

Златна Бубамара за Спортски подвиг доби алпинистката Илина Арсова за искачувањето на врвот Винсон на Антарктикот. Со искачувањето на овој врв, висок 4892 метри, Илина го комплетираше потфатот „Седум врвови“, станувајќи првата Македонка што ги искачила највисоките планини на сите седум континенти.

За Најдобара театарска претстава беше избрана „Мој термин“, во продукција на МНТ. За Театарски актер на годината беше прогласен Јордан Симонов, додека за Актерка на годината, Тања Кочовска.

Наградата за Трајни музички вредности ја доби белградскиот рок-бенд „Електрични оргазам“.

Ристо Вртев, фронтменот на групата Архангел, го доби признанието за Трајни музички вредности во рок музика.

Кавалџијата Ангеле Димовски, еден од најпознатите во традицијата на македонската музика, е овогодишен добитник на Златна бубамара за животно дело.