„Има ли воздух“ во изведба на Филип Поповски долго време беше на врвот на топ листата на „Радио Бубамара“. Токму со оваа песна, јунаците од детската серија „Дајте музика“ ѝ се претставија на публиката во преполната сала во СЦ „Борис Трајковски“ на 23-тото издание на манифестацијата „Златна Бубамара на популарноста“.
Филип, Наташа, Кики, Саша, Јован и Тео, придружувани од членовите на танцовото студио „Еурека“, со специјално изготвен перформанс за алармантноста на аерозагадувањето, на публиката ѝ порачаа дека децата се всушност најпогодените од овој феномен.
Со оглед на тоа што Златна Бубамара на популарноста е приредба за најдобрите и најпопуларните медиумски проекти во земјава, акцентот беше ставен на популарноста на серијалот „Дајте музика“ кај најмладите.
Главните протагонисти навистина се израдуваа на златната статуетка за Најпопуларна детска ТВ емисија за 2019, која до последен момент не знаеја дека ќе им биде доделена. Среќата беше повеќе од очигледна на сцената, на која покрај дечињата, беа и нивната менторка Весна Петрушевска, носителката на проектот Цаци Паковска, како и Ранко Рангеловиќ и Ирена Спировска, кои ја презентираа наградата.
„Дајте музика“ е заеднички проект на „Македонската радиотелевизија“ и продукцијата „Рифенштал“. 30-те епизоди од серијалот имаат за цел преку забава да ги поттикнат традиционалните семејни вредности низ призмата на една нова модерна генерација на детски идоли кои ги почитуваат вистинските вредности: добро однесување, здрави навики, искреност, одговорност, вистинско другарство и емпатија.
Фото: Филип Вирановски
