„La La Land“ со најмногу награди на BAFTA 2017

Синоќа, Британската академија за филмски и телевизиски уметности им додели награди на најдобрите во филмската индустрија за изминатата година. Седумдесеттото по ред издание на „BAFTA“ се одржа во концертната сала „Ројал Алберт хол“ во Лондон.

„La La Land“ беше големиот победник на вечерта со пет освоени награди. Мјузиклот ги „собра“ статуетките за Најдобар филм и Најдобра кинематографија, Ема Стоун беше прогласена за Најдобра актерка, Демиен Шазел стана Најдобар режисер, а музиката од филмот ја освои статуетката за Најоригинална музика.

Честа да биде наречен Најдобар актер му припадна на Кејси Афлек за неговата улога во филмот „Manchester by the Sea“, додека победник во категоријата Најдобар актер во споредна улога беше Дев Пател за филмот „Lion“.

Виола Дејвис беше прогласена за Најдобра актерка во споредна улога.

„Kubo and the Two Strings“ ја присвои наградата за Најдобар анимиран филм, „13th“ за Најдобар документарец, „I, Daniel Blake“ за Најдобар британски филм, а „Son of Saul“ за Најдобар филм од неанглиско говорно подрачје.