„The Revenant“ на Леонардо Дикаприо доминираше на BAFTA 2016

Синоќа Лондон беше домаќин на престижната манифестација по повод доделувањето на овогодишните BAFTA награди. На 69. по ред издание, Британската академија за филмски и телевизиски уметности ги прогласи најдобрите во филмската индустрија за годината која измина.

„The Revenant“ беше големиот победник на вечерта и ја збогати својата колекција за уште пет нови награди. Американскиот трилер беше прогласен за Најдобар филм, режисерот Алехандро Гонзалес Ињариту за Најдобар режисер, додека Леонардо Дикаприо доби уште една потврда дека е Најдобар актер.

Веднаш зад „The Revenant“ по број на награди се наоѓа „Mad Max: Fury Road“, со четири освоени награди меѓу кои за Најдобра костимографија и Најдобра шминка и фризура.

За Најдобра актерка беше прогласена Бри Ларсон за улогата во филмот „Room“, додека за Најдобра актерка во споредна улога беше избрана Кејт Винслет за биографскиот филм за Стив Џобс. Најдобар актер во споредна улога е Марк Рајланс за улогата во филмот „Bridge of Spies“.

Документарецот за прерано починатата музичка ѕвезда Ејми Вајнхаус, „Amy“, беше почестен со наградата Најдобар документарен филм.

„Inside Out“ беше победник во категоријата Најдобар анимиран филм, „Brooklyn“ беше прогласен за Најдобар британски филм, додека за Најдобар филм од неанглиско говорно подрачје беше избран „Wild Tales“.