Фото-проектот „Будење“ испраќа силна порака: Различноста е моќна и убава. Позитивната кампања беше започната минатата година од страна на Ирена Мила, Елена Фидановска и Верица Пиперевска, кои се авторки на уметничките дела фотографии, социологот Иванна Хаџиевска, како и Анче Туфекчиева и Даниела Мирческа, кои се родители на деца со Даунов синдром и аутизам.
Лиса е нашата мала принцеза, пејачка и модел.
Целта на кампањата „Будење“ е да се подигне свеста за присуството на лицата со различни попречености и ретки болести и за потребата од нивно рамноправно вклучување во општеството. Притоа, акцентот се става на способностите и предностите на овие лица, наместо, како што е вообичаено, на нивните ограничувања. Фотографиите се своевидни уметнички дела кои на креативен начин покажуваат дека секое дете има свои желби и афинитети.
Ирена Мила ги објави позитивните фотографии на порталот BoredPanda и испрати порака: „Секое детство е незапирливо и не познава граници. Сите деца имаат свои соништа и желби и начинот на кој ги остваруваат нивните соништа ги дефинира како личности. Како родители, ние треба да им го дадеме сиот простор што им е потребен за да се изразат себеси, да им дадеме поддршка во нивните мали движења и да им покажеме дека не постојат граници, да им покажеме дека можат да бидат сè што ќе посакаат, а можеме да го направиме тоа ако им дадеме шанса.“
Пораката што ја испраќаат фотографиите е јасна: Треба да се научиме да го гледаме тоа што овие деца го можат, а не само тоа што не го можат. На овие лица треба да им се даде простор и шанса за да се изразат себеси и за да сфатат дека не се сами и исклучени од социумот.
Погледнете ги желбите и соништата на овие лица:
Верица, таа сака да го набои целиот свет со водни бои.
Максим, тој е нашето слатко дете.
Маркијан е чудесно дете, со големо срце, полно со љубов за сите луѓе.
Дејан е нашиот херој, боксот е неговиот омилен спорт и тој обожава акциски филмови.
Баба Милица има 65 години, сака сончеви утра и народни песни и танци.
Бети и Костадинка, тие се најдобри другарки.
Костадинка сака дожд и шарени чадори. Омилена забава ѝ е да скока во дождовните вирчиња.
Матилда е нашата отмена дама. Таа знае да готви навистина вкусна храна.
Матилда и нејзината слобода.
Страста на Трајче е музиката, а неговите омилени инструменти- хармоника и гитара.
Дејан и Трајче, тие се нашите слатки актери.
Омилениот спорт на Бети е правење балончиња од сапуница. Таа сака лето и сладолед од чоколадо.
Иван сака музика. Тој сонува дека еден ден ќе вози автобус.
Јане е единствениот фудбалер кој истовремено е и возач на формула. Го има запознаено Роналдо. Јане е веќе многу познат.
Илина сака кик-бокс, скокање на кревет, пливање и цртање.
Цако и Флоренс.
Александар Матовски зборуваше во ОН на Светскиот ден на лицата со Даунов синдром. Флоренс плива, глуми, танцува. Тие се вљубени повеќе од една година.
Ерато сака да гледа реклами, да слуша музика и да игра на компјутер. Таа е позната како девојчето со најубавата прегратка.
На Илина ѝ сјаат очите и таа има прекрасен глас. Секогаш ја има поддршката од своите две сестри.
Милош и Пепица комуницираат со знаци и со чиста љубов.
Огнен сака да плива и да игра тенис. Има големо познавање за диносаурусите. Тој ќе биде палеонтолог.
Нашето општество е сѐ уште полно со предрасуди и овие лица се сѐ уште етикетирани како различни и како лица со посебни потреби. Нема ниту точна статистика колку лица во Македонија живеат со некоја ретка болест или попреченост. Но, време да се поттикне размислувањето дека, можеби, не станува збор за посебни потреби туку за посебни способности.
