Грижлив татко си истетовира на главата „лузна“ идентична на лузната од операција на неговиот син за да му ја врати изгубената самодоверба.
На 8-годишниот Габриел му бил дијагностициран малиген тумор на мозокот во март минатата година, по што следувала операција и третмани со хемотерапија. Иако состојбата на Габриел се стабилизирала и туморот престанал да се шири, тој се чувствувал непријатно во својата кожа бидејќи луѓето постојано зјапале во неговата лузна.
Кога Габриел му признал на татко си дека се чувствува како „чудовиште“, тој знаел дека мора да преземе нешто. „Кога го слушнав тоа, ми се скрши срцето“ – рекол Џош кој одлучен да му ја врати самодовербата на синот, си направил идентична „лузна“ на главата.
„Му реков: Ако луѓето сакаат да зјапаат, нека зјапаат во двајцата“ – раскажал таткото.
Фотографијата од Џош и Габриел, на која тие позираат со „лузните“ стана вирален хит на социјалните мрежи откако победи на натпревар за „Најдобар ќелав татко“ организиран по повод Денот на таткото. Во натпреварот учествуваат мажи кои си ги избричиле главите за да поддржат дете болно од рак.
