Принцот Хари и Меган Маркл најавија дека на одреден начин се дистанцираат од кралското семејство. Славниот пар соопшти дека се повлекува од кралските должности и дека ќе работи на финансиска независност. Тоа би значело дека веќе нема да добиваат пари од фондот наменет за британското кралско семејство и финансирање на нивната работа.
„По неколкумесечни размислувања и приватни дискусии, избравме оваа година да преминеме кон исцртување на нова прогресивна улога во рамките на оваа институција. Нашата намера е да отстапиме од улогата на постари членови на кралското семејство и да работиме да станеме финансиски независни додека продолжуваме целосно да ја поддржуваме Кралицата. Поради вашата поткрепа, особено во изминативе години, се чувствуваме подготвени да го направиме овој чекор.“
„Сега планираме да го распределиме нашето време помеѓу Обединетото Кралство и Северна Америка. Овој географски баланс ќе ни овозможи да го растеме нашиот син оддавајќи ѝ почит на кралската традиција во која беше роден додека истовремено ќе му дадеме на нашето семејство простор да се фокусира на следното поглавје, вклучително и лансирањето на нашиот нов хуманитарен ентитет“ – се вели во нивното соопштение.
Популарната двојка ќе продолжи да живее во Виндзор кога ќе престојува во Велика Британија, но ќе има и свој дом во Северна Америка. Исто така, тие најавија дека ќе комуницираат со медиумите и јавноста многу поотворено и позачестено.
Изминативе месеци, Хари и Меган многу често беа критикувани од одредени таблоиди. Од нивната одлука да летаат со приватен авион, до трошоците за облека на Војвотката, негативните коментари пристигнуваа редовно. Исто така, наголемо се зборуваше и за тензијата во односите на Хари и Вилијам, па за многумина, денешната одлука на кралскиот пар не е изненадување.
