Контроверзниот милијардер Павел Дуров го шокираше светот.
40-годишниот соосновач на Telegram изјави дека ќе им го подели богатството на своите 106 деца.
Во интервју за Le Point, директорот на популарната платформа ја објави својата одлука за распределување на неговото богатство, кое според Forbes, се проценува над 17 милијарди долари.
Дуров е татко на шест деца зачнати на природен начин со три различни партнерки, а сподели дека има уште околу 100 деца зачнати преку донирање на сперма на бројни парови во 12 земји.
„Сакам да појаснам дека не правам разлика меѓу моите деца – оние кои се зачнати природно и оние кои дошле преку донирање сперма. Сите тие се мои деца и ќе имаат еднакви права. Не сакам да се караат по мојата смрт“ – изјавил Русинот, но додал дека ниту едно од децата нема да ги добие парите во следните 30 години, или пред 19 јуни 2055 година.
„Сакам да живеат како нормални личности, а изградат свои животи, да научат да си веруваат самите себе, да бидат способни да создаваат, а не да зависат од банкарска сметка“ – рекол тој.
Павел открил дека има деца зачнати преку донирање на сперма откако Русинка која живее во Швајцарија објавила дека тој е таткото на нејзините три деца. Тие го носат неговото презиме.
Павел со Ирина која е мајка на три негови деца
Павел со девојката Јулија
Русинот одлучи сега да го подели богатството, бидејќи неговата работа вклучува ризик.
Во 2024 година, француските власти подигнаа обвинение против Павел како наводен соучесник во водење платформа во која можеле да напредуваат нелегални активности, како што се материјал за сексуална злоупотреба на деца, трговија со дрога и измами.
Оваа платформа кај нас стана популарна со контроверзната група „Јавна соба“, во која беа злоупотребувани фотографии и лични податоци на девојки од Македонија.
