Женската убавина низ светот: Портрети од различни точки на Земјата во „Атласот на убавината“

Да се покаже универзалноста на убавината е целта на фотографката Михаела Норок. Романската уметница веќе 4 години нема постојана адреса на живеење бидејќи патува ширум светот и фотографира жени. Насловот на нејзиниот креативен проект е „Атлас на убавината“, а за неговата реализација Михаела има посетено над 60 различни земји.

„Мојата цел е да покажам дека секоја жена сјае како ѕвезда бидејќи убавината е разновидност, а не само тоа што го гледаме во масовните медиуми. Според мене, вистинската убавина нема возраст, боја или тренд. Можеш да ја најдеш во Африка или во Европа, во село или во облакодер, во насмевка, во гест, во интензивен поглед, во брчки или во приказна. Можеш да ја најдеш во секое љубезно човечко суштество“ – објаснува Михаела.

Проектот брои околу 500 портрети кои го покажуваат разнообразието на убавината пронајдена во различни точки од планетата. Портретите прикажуваат природни жени во нивната автентична културна средина и ги споделуваат со светот нивните животни приказни. „Во време на омраза и нетолерантност, сакам да испратам порака за љубов и прифаќање. Се надевам дека оваа книга ќе стигне до многу домови низ светот, убедувајќи ги луѓето дека различноста е богатство, а не е поттикнувач на конфликти и омраза. Сите сме многу различни, но во исто време сме дел од истото семејство“ – вели фотографката.