Заљубен пар од Германија патува низ светот и создава прекрасни фотографии кои ја доловуваат убавината на нашата планета.
Пред да започнат да патуваат, Јоханес и Вивиен имале добро платени работни места, но воопшто не биле среќни со нивниот живот. Пред две години, младите авантуристи решиле да дадат отказ и да го следат нивниот сон.
Тие во моментов живеат на Бали, но постојано ја водат својата романса на прекрасни дестинации низ светот. Нивните фотографии ќе ви го разбудат копнежот за патувања и со нетрпение ќе го очекувате моментот кога рестрикциите за движење ќе се „срушат“.
„Ние сме ентузијасти од Германија. Пред две години, ги напуштивме нашите работни места во областа на правото и на финансиите. Одлучивме целосно да ја промениме насоката на нашиот живот и да го истражуваме светот и да го живееме нашиот сон.“
„Како и повеќето луѓе, и ние живеевме живот каков што општеството ‘очекува’ од тебе: завршивме средно училиште, се запишавме на факултет и двајцата започнавме да градиме кариери кои ветуваат добри финансии. Но, тоа не нè исполнуваше и воопшто не нè усреќуваше, па започнавме да размислуваме за живот кој навистина би нè усреќил, а не за живот што се очекува од нас.“
„Пред две години, конечно одлучивме да направиме чекор кон исполнет живот полн со авантури и оттогаш патуваме низ светот.“
„Наша цел е да ги овековечиме нашите искуства со фотографии и да ја споделиме убавината на нашата планета онака како што ние ја гледаме низ објективот“ – пишува на нивниот сајт.
