Бројни македонски и балкански музички ѕвезди се обединија и пееја во чест на нашиот непреболен ангел Тоше Проески. Синоќа во Вип арената „Борис Трајковски“ одекнуваа најголемите хитови на македонскиот пејач 11 години по неговата трагична смрт.
Каролина Гочева, Тамара Тодевска, Тијана Дапчевиќ, Даниел Кајмакоски, Борис Новковиќ, Ања Рупел, групата Фрајле, Наум Петрески, Борис Режак, Антонија Гиговска, Александар Тарабунов, Александра Јанева, Бојан Маровиќ… бројни музичари ги пееја најпознатите песни на Тоше, продолжувајќи ја со тоа неговата хумана мисија.
Средствата кои беа собрани со добротворниот концерт ќе бидат наменети за Домот за деца без родители „11 Октомври“ во Скопје.
„Лагала нас мала“, „Немир“, „Рани на усните“, „Једина“, „Крајње време“, „Чија си“, „Најдрага моја“, „Твоите бакнежи на моите бели кошули“, „Ледена“, „Волим осмех твој“ и „Тајно моја“ беа меѓу песните кои пејачите ги испеаја заедно со публиката, а ги придружуваше бендот на Тоше.
Вчера беше промовиран новиот постхумен албум на Тоше, насловен „Secret Place“, кој вклучува седум нови песни на англиски јазик, како и три преработки на познати хитови.
На концертот, организиран од меѓународната фондација „Тодор Проески“, премиерно беа прикажани два нови спотови со песните од Тоше. Погледнете го видеозаписот за песната „Secret Place“.
