Шоуто на Victoria’s Secret е спектакуларен моден настан редовно следен од над 8 милиони луѓе. На ревијата, едни од најубавите жени на светот дефилираат облечени во фантастични креации.
Но, за да изгледа сè совршено, зад завесата подготовките започнуваат месеци порано. Познатиот британски медиум Telegraph успеа да добие пристап до една од пробите за големиот настан кој ќе се одржи в среда и да поразговара со Адријана Лима за нејзината подготовка. Дополнително, можете да видите неколку од креациите кои Лима ќе ги носи на долгоочекуваната ревија.
30-годишната манекенка започнала да тренира за ревијата секој ден уште од август, а во последните три недели таа вежба и по двапати дневно.
„Навистина е напорно и тоа не само затоа што се вежба долго време, туку и поради интензитетот: скокам на јаже, боксувам, кревам тегови. Ми здосадува да го правам тоа. Ако не се движам, лесно ми здосадува“ – изјавила Лима.
Покрај вежбањето, Лима редовно се консултира со нутриционист кој ја мери нејзината мускулна маса, мастите во телото и задржаната вода. Тој ја советува кои витамини, суплементи и протеински шејкови да ги пие за да може да си ја зачува енергијата за време на тренинзите.
Адријана пие скоро по 4 литри вода дневно. Девет дена пред шоуто таа ја исклучува цврстата храна од менито и консумира само протеински шејкови во кои има и јајца во прав. Во текот на двата дена пред ревијата Лима пие само нормално количество вода, а во последните 12 часа воопшто не пие вода.
„Без никакви течности за да се исушиш, понекогаш можеш да изгубиш до 3,5 килограми само од тоа“ – признала Лима.
Лима е ангел на Victoria’s Secret уште од 2000 година и признава дека тоа е остварување на нејзините соништа. „Тоа отвора толку многу врати, сите го знаат твоето име, цел свет те препознава. Секој модел на овој свет би сакал да биде Ангел“ – дополнила Адријана.
