Лас Вегас и оваа година беше домаќин на музичкиот фестивал на iHeartRadio. Во текот на два дена публиката имаше можност да ужива во изведбите на многу ѕвезди, меѓу кои најсилни аплаузи заработија Елтон Џон и Queen заедно со Адам Ламберт.
Queen + Адам Ламберт + fun.
Сите се согласни дека никој не може да го замени големиот Фреди Меркјури, но Адам Ламберт со своите вокални способности ги одушеви присутните. Делејќи го предниот дел на сцената со Брајан Меј, Ламберт со леснотија минуваше низ незаборавните хитови „Bohemian Rhapsody“, „We Will Rock You“, „Who Wants To Live Forever“, „A Crazy Little Thing Called Love“, „We Are The Champions“, „Another One Bites The Dust“...
За време на получасовниот настап, на сцената се појави и фронтменот на fun., Нејт Рус, кој се вклучи во изведбата на „Fat Bottomed Girls“, а ја испеа „Somebody To Love“.
Елтон Џон
Свирејќи на црвено пијано, 66-годишниот пејач ги испеа своите хитови „Tiny Dancer“ и „Bennie And The Jets“.
Кети Пери
Кети Пери не може да се пофали со силен глас за време на настапите во живо, но затоа пак зад себе има голем број хитови и огромна мрежа фанови. На големата сцена таа исполни песни како „I Kissed a Girl“, „Wide Awake“, „California Gurls“, „Teenage Dream“, „Dark Horse“ и „Roar“.
Бруно Марс
Бруно Марс го задржа вниманието на публиката со енергични движења и хитови како „Locked Out of Heaven“, „Treasure“, „When I Was Your Man“, „Runaway Baby“ и „Gorilla“.
Џастин Тимберлејк
Џастин неуморно танцуваше додека ги исполнуваше „Cry Me a River“, „Sexy Back“, „Take Back the Night“ и „Mirrors“, а ги изненади обожавателите со две нови песни – „True Blood” и „Only When I Walk Away“ од новиот албум „The 20/20 Experience (2 of 2)“.
Мајли Сајрус
Мајли Сајрус не се откажува од провокативниот имиџ. 20-годишната пејачка која во последниве недели постојано е критикувана за невоздржаното танцување и разголување, се појави на фестивалот во разголено издание. Сајрус ги исполни „We Can't Stop“ и „Look What They've Done To My Song“, а потоа се расплака додека ја пееше баладата „Wrecking Ball“.
Пол Мекартни
Популарниот музичар испеа хитови како „Lady Madonna“, но ги почести присутните и со нова музика. „Everybody Out There“ е дел од неговиот нов албум.
