Во Битола вчера згаснаа рефлекторите и светлата на големата сцена, но магијата остана да пулсира во воздухот. Официјално заврши 46-тото издание на фестивалот „Браќа Манаки“, а со свеченото затворање, градот под Пелистер ја потврди својата привилегирана улога на културна престолнина и светилник на филмската уметност.
Последната вечер беше круна на еднонеделната прослава на филмската камера, обединувајќи го минатото и сегашноста во незаборавен визуелен спектакл. За време на Фестивалот, на публиката ѝ беа подарени моменти исполнети со емоции, аплаузи и восхит, а наградите најдоа достоинствени сопатници.
На црвениот тепих на затворањето дефилираа филмски уметници и фанови на седмата уметност кои обединето аплаудираа за креативноста и визијата на едни од најдобрите кинематографери.
Mакедонскиот филм „Диџеј Ахмет“ на Георги М. Унковски го затвори Фестивалот во чест на Јанаки и Милтон Манаки.
Сместен во оддалеченото јуручко село Коџалија, Македонија, „Диџеј Ахмет“ ја раскажува приказната за 15-годишниот Ахмет, кој открива прибежиште во електронската музика како излез од неговата традиционална средина. Филмот е драма со примеси на комедија, приказна за љубовта, пријателството и само откривањето на еден тинејџер, поставена на динамична позадина во која се судруваат традиционалните вредности и модерното време. Снимањето на филмот траеше 36 дена и се одвиваше на крајот на 2023 година, во селата Коџалија и Али Коч во Радовиш, а дел од снимањето беше и во Скопје. Филмот е на турски и македонски јазик.
Главните улоги ги играат Ариф Јакуп, Дора АканЗлатанова и Агуш Агушев, кои за прв пат се појавуваат на филмското платно, како и Аксел Мехмет. Во останатите улоги се: Селпин Керим, Атила Клинче, Елхаме Билал, Адем Карага, Хакан Даци, Метин Ибрахим, Јеткин Сезаир и други. Продуценти на филмот се Иван Унковски и Ивана Шекуткоска, a кинематографер e Наум Доксевски.
По повод крајот на фестивалската треска, битолскиот градоначалник Тони Коњановски одржа краток говор:
Стигнавме до крајот на уште едно издание, 46-то по ред, од ИФФК „Браќа Манаки“. Фестивал кој повеќе од четири децении ја преттсавува филмската уметност кај нас и во регионот и кој со гордост го врежува името на Битола на светската филмска мапа. Овие неколку фестивалски денови, седум, нашиот град живееше со филмот, пулсираше во ритамот на седмата уметност, Битола беше домаќин на врвни филмски кинематографери, режисери, актери, филмски работници од целиот свет. На нашите сцени, во нашите кина и по нашите улици се разменуваа идеи, се раѓаа нови пријателства и се создаваа идни соработки. Тоа е суштината на „Браќа Манаки“. Да обедини, да инспирира и да ја поттикне креативноста преку моќта на сликата, светлината и приказната.
Овој фестивал не е само културен настан, тој е традиција, идентитет и обврска. Традиција што почива на визионерството на Јанаки и Милтон Манаки, пионерите на балканската филмска камера. Фестивалот е идентитет кој што го гради имиџот на Битола како град на културата, уметноста и филмот. Тој е наша обврска да го негуваме и унапредуваме она што тие го започнаа за да им оставиме на идните генереции уште посилна и побогата филмска приказна. Растежот на фестивалот „Браќа Манаки“ е повеќе од евидентен, но тој понатаму мора да продолжи да се развива и да биде мост помеѓу генерациите, културите и уметностите. Секоја година овој фестивал станува се поважен дел од европскиот и светскиот културен календар што е заслуга на сите овде присутни организатори, поддржувачи, уметници и публиката.
Годинашното издание на Фестивалот се одржа под мотото „Сон на платно“.
Фото: Ивона Кочов, Александар Василевски / Femina.mk
