Најголем дел од жените не се срамат да се појават без шминка пред семејството, партнерот и пријателите, но никако не би сакале без шминка да одат на работа, а уште помалку на прв љубовен состанок.
Истражување на „Vitality Show“, најголемиот британски настан за убавина и здравје, покажало дека 70% од жените не би сакале да се појават пред колегите без целосна шминка на лицето и со несредена коса. Учесничките во истражувањето признале дека одењето на работа без шминка би им предизвикало поголем стрес отколку да одржат јавен говор, да одат на интервју за работа или да одат на прв состанок.
Од 3.000 учеснички, повеќе од половината изјавиле дека не им е непријатно да се појават со „голо“ лице пред своите пријатели, партнерот и семејството, но дури 91% рекле дека побрзо би го откажале излегувањето отколку да отидат на првиот состанок ненашминкани.
Една третина од жените не би отишле во фитнес сала без шминка, а околу 15% не би ја отвориле вратата од домот кога некој им доаѓа на гости ако се немаат разубавено со помош на шминка.
