Приказната за куче кое спаси мало срнче од давење се распространува на социјалните мрежи.
Имено, сопственикот на кучето сподели фотографии и видеа од моментот на спасувањето и повторното обединување на срнчето со мајката, а во описот ја раскажа случката.
„Не можев да го најдам Харли никаде, сè додека не погледнав во езерото. Тој беше сред езеро, насочувајќи го малото срнче назад кон брегот. Не знам зошто срнчето се најде таму, но Харли очигледно не се прашуваше зошто, туку веднаш стапи во акција“ – пишува сопственикот Ралф на Facebook.
Овој момент роди ново пријателство, бидејќи следниот ден Харли повторно се сретнал со срнчето.
„Приказната продолжува. Утрово Харли нетрпеливо трчаше од прозорец на прозорец. Ја отворив влезната врата и можев да го слушнам срнчето како испушта звуци. Харли истрча и го најде кај дрвото. Малечкото се смири, мавташе со опашката, се допреа со носевите и Харли се врати мирно во куќата со мене“ – пишува Ралф.
