Брук, Морган и Шенон се мајки со авантуристички дух кои редовно ги водат своите деца на долги прошетки за да ги тргнат од екраните и да им ја разбудат љубовта кон природата. Решителните Американки имаат мисија да поттикнат што повеќе родители да го направат истото.
Трите мајки ги растат нивните деца претежно во природа и често ги минуваат ноќите на отворено под ѕвезденото небо. Тие ја користат секоја прилика за да планинарат, да се качуваат по карпи, да вежбаат јога и да се поврзуваат со своите малечки.
Брук со синчето Хак
Морган со ќеркичката Хејдли
Шенон со ќеркичката Скај и синот Боди
„Децата во Америка, кои некогаш растеа качувајќи се на дрва со изгребани колена, сега во просек поминуваат само по пет минути надвор во игри кои сами ги смислуваат. Тие поминуваат 7 часа пред екраните. Бројот на деца со прекумерна тежина двојно порасна во последните 20 години. Истражувањата покажуваат дека претераната употреба на технологијата може да доведе до проблеми со концентрацијата, потешкотии во учењето, нарушувања во спиењето и јадењето и обезност, но и дека интеракцијата со природата може да ги намали тие симптоми“ – пишува на нивниот сајт.
Брук, Меган и Шенон во моментов работат на нивниот проект „Born Wild“, кој ќе биде документарен филм во повеќе епизоди. Преку него, активните мајки ќе ги споделуваат своите искуства од престојот во природа, како и совети, насоки и решенија. Првата епизода „Wild Child“ ќе биде посветена на мајчинството.
