Сè за љубов...
Романтичен маж ја запроси својата сакана на мошне оригинален начин.
Фотографот Живаго Сејлс организирал лажна свадба за да ѝ предложи брак на љубовта на својот живот – Лаура.
Лаура и Живаго, кои се професионални свадбени фотографи, се запознале пред осум месеци и набрзо ја започнале својата врска. Инспириран од бројните свадби на кои заедно работеле, Живаго ја добил креативната идеја за предлогот за брак.
Тој посветено до детали ја испланирал свадбата и ангажирал „младоженец и невеста“, свештеник, гости и девојче кое ќе ги носи прстените на младенците до олтарот, а како фотографка ја ангажирал својата девојка.
Малото девојче всушност имало многу важна улога во изненадувањето. Додека Лаура ги фотографирала младенците, како и целата церемонија, девојчето влегло во црквата носејќи кутија со венчални прстени, но наместо фотографија од младенците, во кутијата била поставена фотографија од Лаура и Живаго.
Незабележувајќи ја фотографијата, Лаура продолжила со својата работа. Потоа, започнала да свири песната „Marry You“ од Бруно Марс и во црквата се појавил Живаго. Кога сфатила што се случува, Лаура не можела да им поверува на сопствените очи.
Живаго клекнал на колена пред својата сакана и го добил посакуваното „Да“.
Откако свештеникот им дал благослов, среќниот пар заедно со присутните гости се упатиле да прослават во локален ресторан.
На лажната свадба присуствувале 240 гости, а вистинската свадба на Лаура и Живаго е планирана за следната година.