Живееме во време во кое постојано слушаме за врсничко малтретирање, булинг, исмејување... Но, едно специјално одделение од Битола е пример за спротивното.
Дечињата од второ четири одделение од основното училиште „Св. Климент Охридски“ ќе ве научат што е емпатија, љубов и поддршка и ќе ви покажат како цел еден клас, предводен од прекрасна учителка, може да се обедини за да охрабри личности кои се исправени пред голем предизвик.
Во второ четири учат Софи и Теа, девојчиња кои од мали нозе се соочуваат со дијабетес тип 1. Тие носат потежок ранец од останатите ученици. Покрај школскиот прибор, тие носат и инсулин, мерач за шеќер во крвта и закуски.
Но, Софи и Теа не се сами во нивната борба. Зад себе, двете второодделенки го имаат целото одделение и учителката Весна Аврамовска Димитровска, која кога е потребно, им става инсулин за време на часовите.
Видеото снимено по повод Светскиот ден на дијабетесот ја раскажува сторијата за ова одделение и ги покажува секојдневните предизвици со кои се соочуваат овие деца.
Видео
„Суштината на нашата поврзаност е токму ова, синиот круг преплетен меѓу нас како нераскинлива нишка која нè држи заедно и посилно.“
„Тоа сме ние, Теа и Софи. Не знаеме животот каде ќе нè однесе, но знаеме дека ќе бидеме баш вакви. Пред сè луѓе, добри мајки, одговорни сопруги и успешни жени“ – вели во видеото едно од девојчињата.
„Сите на мене ми велат браво за ова што го правиме. Но, јас велам браво за овие деца и за нивните родители на кои секој ден им е вистинска борба“ – вели учителката.
