Сигурно како дете сте мечтаеле книгата ставена под перница да ви помогне утрото да знаете сè. Сега научниците се обидуваат тој детски сон да го направат реалност.
Студентите можат да учат додека се одмараат - тврдат научниците.
Истражувачи во Чикаго откриле дека слушањето на одредени звуци во текот на спиењето може да ја зголеми способноста за помнење. Раководејќи се од тие сознанија, инвенторите создале перница со вграден звучник за да ги преточат во пракса резултатите од истражувањето.
Новата перница „Sound Asleep“ кошта 20 фунти и веќе станала хит меѓу помрзеливите студенти. Вградениот звучник може да се поврзи со MP3 или CD плеер и студентите ќе имаат можност во сонот да ги слушаат претходно снимените лекции.
Истражувачите тврдат дека наутро студентите ќе помнат барем дел од лекциите. Директорот на компанијата Sound Asleep изјавил :„Студентите можат да учат додека се одмараат.“
Иако многу научници веруваат дека е возможно учењето во сон, сепак противниците на оваа теорија сметаат дека слушањето на звуци во текот на спиењето го спречува длабокиот сон кој му е потребен на мозокот за да може да ја складира информацијата поефективно.
